कोल्हापूर – दोन दिवस विवाहपूर्व धार्मिक कार्यक्रम धुमडाक्यात सुरू होते. ११ तारखेला विवाह होणार होता. विवाहाच्या आदल्या दिवशी नियोजित वाग्दत्त वधूचा पाण्याच्या टाकीत बुडून मृत्यू झाल्याने लग्नघरावर एकच शोककळा पसरली. संजना श्रीनिवास वेर्णेकर (वय २७) असे मयत युवतीचे नाव आहे. वाचा: पोलिसांनी या घटनेची माहिती दिली. वेर्णेकर कुटुंबाचे घर गडहिंग्लज संकेश्वर रोडवर आहे. संजनाचा विवाह कर्नाटकातील कारवार तालुक्यात कुमठा येथील तरुणाशी ठरला होता. हा विवाह सोहळा आज, ११ फेब्रुवारी रोजी हुबळी येथील मंगल कार्यालयात होणार होता. त्यामुळे दोन दिवसांपासून वेर्णेकर यांच्या घरात विवाहपूर्व धार्मिक विधी आणि कार्यक्रमाची धामधूम सुरू होती. नातेवाईक गुरुवारी दहा रोजी हुबळीला रवाना होणार असल्याने घरात पहाटे चार वाजल्यापासून लगबग सुरू होती.
सर्व नातेवाईक तयार होत असताना संजना पहाटे पाच वाजण्याच्या सुमारास घराच्या मागे असलेल्या एक हजार लिटर पाण्याच्या टाकीत पाणी आणण्यासाठी गेली. ती लवकर आली नाही म्हणून नातेवाईकांनी तिचा शोध सुरू केला, पण ती सापडली नाही. एका नातेवाईकाने पाण्याच्या टाकीत डोकावून पाहिले असता संजना पाण्याच्या टाकीत बुडाल्याचे लक्षात आले. तिला बाहेर काढण्यात आले, पण तिचा मृत्यू झाला होता. वाकून पाणी घेताना तोल जाऊन टाकीत पडलयाने तिचा मृत्यू झाल्याची माहिती तिच्या घरच्यांनी पोलिस ठाण्यात दिली…
