आरोपीच्या शोधार्थ पोलीस पथक बुलडाणा जिल्ह्यात रवाना ,
अमीन शाह
जालना: जिल्ह्याच्या मंठा तालुक्यातील बेलोरा गावातील दीप्ती उर्फ कल्पना संदीप जाधव (वय १८) हिचे बुलढाणा जिल्ह्यातील मेहकर तालुक्यातील वरुड येथील एका तरुणासोबत १७ मार्च २०२३ रोजी विवाह ठरला होता. मात्र लग्नाच्या आधीच एक भयंकर घटना घडली आहे. नवऱ्यानेच भावी पत्नीची हत्या केल्याचा धक्कादायक प्रकार समोर आला आहे.
वधू आणि वर पक्षांकडील मंडळी आज जालना येथे लग्नाचा बस्ता बांधण्यासाठी आले होते.यावेळी नियोजित वर असलेला तरुणही बस्ता बांधण्यासाठी सोबत आलेला होता. मात्र अचानक तो गायब झाला. तरुणाने थेट वधूचे बेलोरा हे गाव गाठले. वधूच्या घरचे बस्ता बांधण्यासाठी गेले होते घरी फक्त नियोजित वधू दीप्ती उर्फ कल्पना ही एकटीच होती. भावी नवरदेवाने तिच्या गळ्यावर वार केले. हा हल्ला इतका भीषण होता की तिने जागीच आपले प्राण गमावले आहेत.
दरम्यान, गावातील लोकांना हा प्रकार समजताच तिच्या घराबाहेर लोक जमा झाले. तर, खून करून आरोपी पसार झाला होता. घटनास्थळी सेवली पोलीस दाखल झाले असून पंचनामा करीत आहेत. दरम्यान, गावातील नागरिक संतप्त झाले असून त्यांनी आरोपीच्या कुटुंबियांना घरात कोंडून ठेवले असल्याची माहिती मिळाली आहे. घटनास्थळावर उपविभागीय पोलीस अधिकारी तसेच मौजपुरी पोलीस ठाण्याचे पोलीस फौज फाट्यासह दाखल झाले आहेत.भावी नवरदेवाने बस्त्या बांधण्याची लगबग सुरू असतानाच पसार होऊन हा खून केला आहे. नववधूचा गळा कापण्याइतपत नवरदेवाने टोकाचे पाऊल का उचलले हे अद्याप गुलदस्त्यात असून पोलिस तपास करीत आहेत.
पंचनामा करताना पोलीस पथक
