Home पुणे सोबत शिकणाऱ्या मुलाने दिली सोबत शिकणाऱ्या मुलीची सुपारी

सोबत शिकणाऱ्या मुलाने दिली सोबत शिकणाऱ्या मुलीची सुपारी

212

 

 

अमीन शाह

विद्यार्थ्याने पालकांची खोटी स्वाक्षरी केल्याचे शिक्षकांना सांगितल्याचा राग मनात धरून संबंधित विद्यार्थ्याने अल्पवयीन विद्यार्थिनीवर आधी बलात्कार करावा आणि नंतर तिचा खून करावा, यासाठी 100 रुपयांची सुपारी दुसर्‍या वर्गातील अल्पवयीन विद्यार्थ्याला दिल्याचा धक्कादायक प्रकार बुधवारी (दि. 22) दौंड येथील एका इंग्रजी माध्यमाच्या शाळेत उघडकीस आला.

मात्र, शाळेची बदनामी होऊ नये म्हणून तो प्रकार दडपण्याचा प्रयत्न केला तसेच अल्पवयीन विद्यार्थिनीनेच मुलांची बदनामी करण्याच्या हेतूने सुपारी दिल्याचे सांगत तिला मानसिक त्रास देत तिचे शैक्षणिक नुकसान केल्याप्रकरणी मुख्याध्यापकासह वर्गशिक्षक व शिक्षिका, अशा तिघांवर दौंड पोलिस ठाण्यात गुन्हा दाखल करण्यात आला आहे.

याप्रकरणी पीडित विद्यार्थिनीच्या वडिलांनी दौंड पोलिसांत फिर्याद दिली आहे. पोलिसांनी दिलेल्या माहितीनुसार, फिर्यादी यांची मुलगी दौंड शहरातील एका इंग्रजी माध्यमाच्या शाळेत इयत्ता सातवीत शिक्षण घेत आहे. तिच्या वर्गातील एका विद्यार्थ्याने पालकांची खोटी स्वाक्षरी केल्याची माहिती तिने वर्गशिक्षिकेला दिली होती. त्याचा राग मनात धरून संबंधित विद्यार्थी व त्याच्या मित्राने इयत्ता नववीत शिकणार्‍या विद्यार्थ्याला पीडित विद्यार्थिनीवर आधी बलात्कार करून नंतर तिला मारून टाकण्यासाठी 100 रुपयांची सुपारी दिली.

मात्र, त्या विद्यार्थ्याने याबाबतची माहिती पीडितेला दिली. त्यानंतर पीडितेने तिच्या घरी ही माहिती दिली. त्यानंतर पीडितेच्या वडिलांनी वर्गशिक्षक, सुपर वायझरसह मुख्याध्यापकांकडे याबाबत विचारणा करण्यासाठी संपर्क साधण्याचा प्रयत्न केला. मात्र, त्यांनी योग्य तो प्रतिसाद दिला नाही. त्यामुळे फिर्यादींनी दौंड पोलिसांत धाव घेतली. त्यानुसार महिला सहायक पोलीस निरीक्षकांना चौकशी करण्याचे आदेश दिले.

चौकशीदरम्यान मुख्याध्यापकांनी पीडितेवर घाणेरडे आरोप केले. पीडितेनेच 100 रुपये दिले होते व ती विद्यार्थ्यांची बदनामी करत असल्याचे लेखी जबाब तीन विद्यार्थ्यांसह एका वर्गशिक्षकाकडून घेतले होते. तसेच, मुलीनेच विद्यार्थ्याला 100 रुपये दिल्याचेही सांगितले. शिवाय मुख्याध्यापकांनी मुलीला दुसर्‍या शाळेत टाका, असे सुचविले.

हे गंभीर प्रकरण लपविण्यासाठी व शाळेची बदनामी टाळण्यासाठी मुख्याध्यापक व दोन शिक्षकांनी कटकारस्थान करून दुर्लक्ष केले. त्यामुळे पीडितेचे मानसिक व शैक्षणिक नुकसान झाल्याचे फिर्यादीत नमूदकेले आहे. दौंड पोलीस या प्रकरणाचा तपास करत आहेत.